زوجتي لا تحب أهلي وأفكر في طلاقها
السلام عليكم ورحمة الله،
أنا رجل متزوج من سنتين تقريبًا، وعندي مشكلة مع زوجتي ما قدرت أتفاهم معها فيها، ولا أدري هل أنا فعلاً ظالم لها مثل ما تلمح، ولا هي اللي مقصرة!
مشكلتي إن زوجتي ما تحب أهلي، وأقصد بأهلي: أمي وأخواتي. من بداية زواجنا وأنا حريص إن العلاقة بينهم تكون طيبة، وأمي بطبيعتها تحب تهتم وتعرف تفاصيل حياة عيالها. أنا أشوف إنه من حقها تعرف عن حياتي، حتى عن زوجتي، وتدخل بيتنا وقت ما تحب. حتى غرفة نومنا، ما أشوف فيها مشكلة لو دخلت بدون استئذان، هذي أمي بالنهاية، ومالها إلا هذا الولد.
لكن زوجتي دايم تزعل، ودايم معترضة، تقول ما يصير أحد يدخل البيت بدون استئذان، وإن غرفة النوم خصوصية. مرة من المرات دخلت أمي فجأة وشفناها، وزوجتي زعلت زعل مو طبيعي. مع إنه أمي ما قالت شيء ولا سوت شيء، بس كانت حابة تشوف ترتيب الغرفة. أمي تحب ترتب وتزين، وأنا أشوف إن هذا عادي.
غير كذا، أمي دايم تنصحها في طريقة طبخها وتنظيمها للبيت، بحكم إنها أكبر وأفهم، لكن زوجتي تعتبره تدخل. مع إن أمي نيتها طيبة، تبغى البيت دايم مرتب والأكل مضبوط، وهذا في مصلحة زوجتي قبل كل شيء.
أنا الحين صاير بين نارين، أمي تدعي علي، وتقول هذي ما تصلح لك، وزوجتي تزعل مني وتقول إنها مو قادرة تعيش بهالطريقة. وصراحة، أفكر جدياً في الطلاق، لأني ما أقدر أعيش مع وحدة تحسسني إني لازم أختار بينها وبين أمي. بالنهاية هذي أمي، ومن حقها علي حتى لو تدخل في تفاصيل حياتي كلها.
هل أنا غلطان؟ ولا هي اللي مو متربية على احترام أهل الزوج؟